کیا لڑکیاں تھیں یار وہ!

کل سے کرکٹ دنیا میں ایک ہی نام گونج رہا ہے: انگلینڈ کی ٹیمی بیومونٹ (Tammy Beaumont)۔ ویمنز ایشیز کے واحد ٹیسٹ میں انھوں نے 208 رنز کی ایک یادگار اننگز کھیلی۔ یہ کسی بھی انگلش ویمن کرکٹر کی تاریخ کی پہلی ڈبل سنچری تھی۔

آسٹریلیا کے 473 رنز کے جواب میں اُن کی اس اننگز کی بدولت ہی انگلینڈ 463 رنز تک پہنچا۔ وہ الگ بات کہ انگلینڈ کو بچانے کے لیے یہ ڈبل سنچری بھی کافی ثابت نہیں ہوئی۔ آخری اننگز میں 268 رنز کا تعاقب کرتے ہوئے پوری انگلش بیٹنگ لائن 178 رنز پر ڈھیر ہو گئی۔

لیکن بیومونٹ کی یہ اننگز ہماری توجہ ویمنز کرکٹ میں بنائی گئی ڈبل سنچریوں کی جانب ضرور لے گئی ہے۔ اُن سے پہلے 7 ویمن کرکٹر یہ سنگِ میل پار کر چکی ہیں، جن میں سب سے اوپر نام ہے پاکستان کی کرن بلوچ کا۔ 2004 میں ویسٹ انڈیز کے خلاف کراچی ٹیسٹ میں کرن نے 488 گیندوں پر 242 رنز کی اننگز کھیلی تھی، جو ویمنز کرکٹ تاریخ کی سب سے بڑی انفرادی اننگز بنی۔ انھوں نے ایسا ریکارڈ بنایا جو آج 19 سال بعد بھی کوئی نہیں توڑ پایا۔  

ویمنز ٹیسٹ: سب سے بڑی انفرادی اننگز

	رنز	گیندیں	4/6	بمقابلہ	بمقام	بتاریخ
کرن بلوچ	242	488	38/0	ویسٹ انڈیز	کراچی	‏15 مارچ 2004
متھالی راج	214	407	19/0	انگلینڈ	ٹاؤنٹن	‏14 اگست 2002
ایلیس پیری	213*	374	27/1	انگلینڈ	سڈنی	‏9 نومبر 2017
کیرن رولٹن	209*	313	29/1	انگلینڈ	لیڈز	‏6 جولائی 2001
ٹیمی بیومونٹ	208	331	27/0	آسٹریلیا	ناٹنگھم	‏22 جون 2023

یہ ویسٹ انڈیز ویمنز کے دورۂ پاکستان کا واحد ٹیسٹ تھا، جس میں کرن بلوچ نے ساجدہ شاہ کے ساتھ مل کر 241 رنز کی اوپننگ پارٹنرشپ کی۔ یہ بھی ایک ورلڈ ریکارڈ ہے اور تقریباً دو دہائیوں گزرنے کے باوجود آج تک قائم ہے۔

یہی نہیں، اس میچ میں پاکستان کی کپتان شائزہ خان نے بھی کمال کر دیا۔ انھوں نے پہلی اننگز میں 59 رنز دے کر 7 اور دوسری اننگز میں 167 رنز دے کر6 وکٹیں حاصل کیں۔ یوں میچ میں 13 وکٹیں لے کر ایسا ریکارڈ بنایا، جسے آج تک کوئی نہیں توڑ پایا۔    یعنی ویمنز کرکٹ میں بہترین انفرادی اننگز اور بیسٹ بالنگ، دونوں کے ریکارڈ پاکستان کے پاس ہیں ۔

ویمنز ٹیسٹ: میچ میں بہترین بالنگ

	اوورز	رنز	وکٹیں	بمقابلہ	بمقام	بتاریخ
شائزہ خان	71.0	226	13	ویسٹ انڈیز	کراچی	‏15 مارچ 2004
ایشلی گارڈنر	45.2	165	12	انگلینڈ	ناٹنگھم	‏22 جون 2023
بیٹی ولسن	29.3	16	11	انگلینڈ	میلبرن	‏21 فروری 1958
جولیا گرین ووڈ	36.0	63	11	ویسٹ انڈیز	کینٹربری	‏16 جون 1979
لوسی پیئرسن	58.0	107	11	آسٹریلیا	سڈنی	‏22 فروری 2003

لیکن اب ذرا افسوس کی بات سن لیں۔ پاکستان نے اس کے بعد کبھی کوئی ٹیسٹ نہیں کھیلا۔ یہ پاکستان ویمنز کا تیسرا ٹیسٹ تھا، پہلا سری لنکا کے خلاف 1998 اور دوسرا آئرلینڈ کے خلاف 2000  میں کھیلا گیا، جن میں ناکامی کا منہ دیکھنا پڑا۔ البتہ پاکستان ویسٹ انڈیز کے خلاف یہ میچ ڈرا کرنے میں کامیاب ہوا اور پھر دوبارہ کبھی کوئی ٹیسٹ نہیں کھیلا۔